Azərkosmos Millətlər Birliyi ilə birgə tədbir keçirib

Millətlər Birliyi Azərkosmos ilə birgə “İnkişaf etməkdə olan Kiçik Ada Dövlətlərində iqlim fəaliyyətinin artırılmasında coğrafi məkan məlumatının rolu” adlı tədbir təşkil edib. COP29 çərçivəsində keçirilən tədbir peyk əsaslı məlumatların inkişaf etməkdə olan Kiçik Ada Dövlətlərində iqlim dəyişikliklərinin təsirlərinin azaldılmasında vacib rolunu vurğulayıb.   

Tədbirdə çıxışçılar və panel iştirakçıları arasında Azərkosmosun İdarə heyətinin sədri Saməddin Əsədov, Millətlər Birliyi Katibliyinin İqtisadiyyat, Gənclər və Dayanıqlı İnkişaf İdarəsinin baş direktoru Dr. Rut Kattumuri, Millətlər Birliyi Katibliyinin İqtisadiyyat, Gənclər və Dayanıqlı İnkişaf İdarəsinin İqlim Dəyişiklikləri Araşdırma və Siyasət üzrə mütəxəssisi Ekta Dudani, Millətlər Birliyi Katibliyinin Süni İntellekt, Ticarət, Okeanlar və Təbii Ehtiyatlar üzrə baş direktoru Sureş Yadav iştirak ediblər.     

2014-cü ildən etibarən Azərkosmos, Azərbaycanın Milli Kosmik Proqramı çərçivəsində Yerin Müşahidəsi üzrə xidmətlərin göstərilməsində ön plandadır. Azərkosmos peyk əsaslı iqlim monitorinqi ilə Azərbaycanın 17 Davanıqlı İnkişaf Məqsədlərinə doğru irəliləməsini dəstəkləyir və bu sahədə məlumatlara əsaslanan hesabatlar hazırlayır. Peyk texnologiyaları, iqlim dəyişikliyi, resursların idarə edilməsi, biomüxtəlifliyin qorunması, su təchizatı və sanitar xidmətlər, şəhərsalma və dayanıqlı şəhərlərin yaradılması kimi məsələlərə həll yolları təqdim etməkdə mühüm rol oynayır.  

Son on ildə Azərkosmos müxtəlif sahələrdə, o cümlədən kənd təsərrüfatı, ekologiya, şəhərsalma və kadastr inkişafı sahələrində 1000-ə yaxın layihə həyata keçirib. 

Bu il Azərkosmos üçün mühümdür, Agentlik Millətlər Birliyi Katibliyi və onun üzv ölkələri, xüsusilə İnkişaf etməkdə olan Kiçik Ada Dövlətləri ilə əməkdaşlığa başlayıb.

Azərkosmos iqlim davamlılığını dəstəkləmək üçün peyk əsaslı texnologiya və coğrafi məkan məlumatlarından istifadə edən bir proqram hazırlayıb. Hal-hazırda, Azərkosmos Millətlər Birliyinin üzv dövlətlərində, xüsusən Tonqa, Tuvalu, Vanuatu, Kiribati və Papua Yeni Qvineyada xüsusi təşəbbüslər həyata keçirir. Bu təşəbbüslərə:

• Quraqlıq səviyyəsinin monitorinqi və risklərin qiymətləndirilməsi

• Kənd təsərrüfatı və əkinçilik təsnifatı

• Meşə monitorinqi

• Metan konsentrasiyasının monitorinqi daxildir.