Azərkosmos 27-28 iyunda keçirilən “Baku Investment Day” (Baku ID) tədbiri çərçivəsində “Kosmik innovasiya: biznes strategiyalarının cəmiyyətin tələbləri ilə uyğunlaşdırılması, təxirəsalınmaz çağırışlar, Yer kürəsində həyatın yaxşılaşdırılması” panel sessiyasında iştirak edib.
Sözügedən sessiyada Azərkosmosun İdarə Heyətinin sədri Saməddin Əsədov, Türkiyənin ilk astronavtı, hərbi pilot Alper Gezeravcı və kosmosda dayanıqlılıq və təhlükəsizlik, eyni zamanda kosmos bazar araşdırmaları şirkəti olan “Slingshot Aerospace”in sədrinin müşaviri Dana al-Salem çıxış ediblər.
Saməddin Əsədov çıxışında kosmik fəaliyyət və innovasiyaların planetimizə təsirinə diqqət çəkərək ilk baxışda uzaq olan kosmosun, yaxın olan Yerdəki problemlərin həllinə verdiyi töhfələri qeyd edib. Onun sözlərinə görə, innovasiyanın əsas mühərrikini elm və təhsil təşkil edir. İdarə Heyətinin sədri kosmik innovasiya ekosisteminin inkişafında universitetlər, tədqiqat institutları və özəl şirkətlərin birgə fəaliyyətinin əhəmiyyətini vurğulayıb. “Onlar birlikdə tədqiqat aparır, texnologiyaları inkişaf etdirir və gələcək nəsil alim və mühəndisləri yetişdirirlər”, – deyə Saməddin Əsədov bildirib. Azərkosmosun da ölkəmizdə milli kosmik ekosistemin inkişafı istiqamətində öz səylərini davam etdirdiyi nəzərə çatdırılıb.
Digər spikerlər də kosmik sahə və əlaqədar innovasiyaların gündəlik həyatımıza töhfə verə biləcəyi ideyaları vurğulayıb, bu nəticələrə nail olunmasına dəstək ola biləcək startap ideyalarına diqqət çəkiblər.
Panel müzakirəsinin sonunda tədbir iştirakçıları üçün Alper Gezeravcı ilə avtoqraf sessiyası keçirilib.
Bizimlə əlaqə
Peşəkar komandamız sizi maraqlandıran sual və sorğularınıza cavab verməyə hər zaman hazırdır.