Beynəlxalq Astronavtika Konqresinə elmi məqalə təqdim etmək üçün qeydiyyat davam edir

Cari ilin 14-18 oktyabr tarixlərində İtaliyanın Milan şəhərində 75-ci Beynəlxalq Astronavtika Konqresi (Milan BAK) keçiriləcək.

“Dayanıqlılıq naminə kosmik məsuliyyət” (Responsible Space for Sustainability) çağırışı ilə keçirilən tədbirin elmi müsabiqəsi də mövccudur. Ölkəmizi bu ilki Konqresdə elmi məqələ ilə təmsil etmək istəyən mütəxəssisləri, 28 fevral tarixinədək verilmiş veb-sayt: https://iafastro.directory/iac/account/login üzərindən müraciət edə bilərlər.

Elmi məqələ ilə müraciət etmək istəyən şəxslərə aşağıda verilmiş qeydlərlə yaxından tanış olmaq tövsiyə olunur.

Hazırlayacağınız elmi məqalələr aşağıdakı meyarlar üzrə seçiləcəkdir:

1.    Elmi məqalənin ideya və nəzəri-praktik nümunələr baxımından orijinallığı və iştirakçının özünün yaratdığı kontent olması vacibdir;

2.    Milan BAK-ın “Dayanıqlılıq naminə kosmik məsuliyyət” (Responsible Space for Sustainability) sloqanına uyğun hazırlanmış məqalə;

3.    Yüksək səviyyədə ingilis dili biliyi;

4.    Natiqlik bacarıqları, güclü ünsiyyət bacarıqları: nitqin aydın və axıcı olması.

İştirakçılar aşağıdakı sahələr üzrə elmi işlərini təqdim edə bilərlər:

·      Elm və tədqiqat – gündəlik həyatda kosmosun təsiri, kosmik tədqiqat, kosmik tullantılar və Yerdən kənar tədqiqat da daxil olmaqla missiyaları təmin edən kosmik sistemlər və aparatlar haqqında;

·      Tətbiqlər və əməliyyatlar – Yer müşahidəsi, rabitə, naviqasiya, insanın kosmik sahədə görüdüyü işlər və kiçik peyklər daxil olmaqla, davam edən və gələcək əməliyyat tətbiqləri;

·      Texnologiya – astrodinamika və kosmik sistemlər üçün ümumi texnologiyalar

·      İnfrastruktur – kosmik sistemin daşınması, gələcək sistemlər və təhlükəsizlik daxil olmaqla, kosmik missiyaları təmin edən sistemlər;

·      Kosmos və cəmiyyət – kosmosun cəmiyyətlə qarşılıqlı əlaqəsi, o cümlədən təhsil, siyasət, iqtisadiyyat, tarix və hüquq sahələrində kosmosun təsiri;

·      Kosmik sahədə innovasiyalar.

Elmi işlər aşağıda qeyd olunan təlimatlar əsasında qəbul olunur: 



·       Elmi iş ingilis dilində “Microsoft Word” sənədində yazılmalı;

·       Hər bir müəllif bir neçə məqalə təqdim edə bilər;

·       Məqalənin xülasə hissəsi maksimum 400 sözdən ibarət olmalıdır;

·       Məqalə hazırlanarkən bütün müəlliflərin adı qeyd olunmalıdır; Məqalə əsas müəllif tərəfindən qeydiyyatdan keçirilməlidir.

·       Müəllif https://iafastro.directory/iac/account/login/ saytında qeydiyyatdan keçdikdən sonra hesab yaradıb “restricted area” bölməsinə məqalələrini yükləməlidir;

·       Xülasənin təqdim olunması üçün son tarix: 28 fevral 2024-cü ildir.

·       Məqalənin strukturu aşağıdakı hissələrdən ibarət olmalıdır:

·       Başlıqdakı bütün sözlər böyük hərflə yazılmalıdır;

·       Giriş hissə elmi işin məqsədini bildirməlidir;

·       Metodologiya bölməsi elmi işdə istifadə olunan metodları göstərməlidir;

·       Nəticələr və müzakirə hissəsində müəllif(lər) elmi işin yekun nəticələrini göstərməli və izah etməlidirlər. Məqalədə cədvəl və ya qrafiklərin istifadəsi yol verilməzdir;

·       Yekun hissədə məqaləni bir cümlədən çox olmayan fikirlə ifadə etmək arzuolunandır.

Xatırladırıq ki, ötən il Bakıda keçirilmiş Konqres çərçivəsində ölkəmiz tədbir tarixində ilk dəfə rekord sayda – 214 elmi məqalə təqdim etmişdir. Onlardan 81 elmi məqalə Azərbaycanın 14 universitetində təhsil alan tələbələr tərəfindən hazırlanmışdır.