Azərbaycan Nəqliyyat və Kommunikasiya Holdinqinin (AZCON Holding) tərkibində fəaliyyət göstərən Azərkosmosun və Dialogue Events-in təşkilatçılığı ilə bu gün Bakı şəhərində Kosmik Texnologiyalar Konfransı 2025 (STC2025) öz işinə başlayıb.
Konfransın məqsədi Mərkəzi Avrasiya regionunda və ümumilikdə dünyada kosmik texnologiyalar sahəsində əməkdaşlığı gücləndirmək, innovasiyaları təşviq etmək və kosmosun qlobal iqtisadiyyatda artan roluna dair müzakirələr aparmaqdır.
Bu il tədbirə 420-dən çox nümayəndə, o cümlədən kosmik agentliklərin rəhbərləri, dövlət qurumlarının nümayəndələri, özəl sektor təmsilçiləri və beynəlxalq ekspertlər bir araya gəlib. İki gün ərzində 200-dən artıq ikitərəfli görüş, 50 spikerin çıxışı, 21 sərgi və 8 müxtəlif sessiya vasitəsi ilə iştirakçılar kosmos sahəsində bilik, təcrübə və trendləri paylaşacaq.
Tədbirin açılış nitqində Azərkosmos İdarə Heyətinin sədri vəzifəsini müvəqqəti icra edən Dunay Bədirxanov - "STC2025 sadəcə bir konfrans deyil — bu, dialoqun hərəkətə keçdiyi, tərəfdaşlıqların formalaşdığı və kosmosun gələcəyinin birgə dizayn olunduğu bir platformadır."
STC2025, Azərbaycanı regionda kosmik texnologiyalar sahəsində bilik mübadiləsinin və strateji tərəfdaşlıqların mərkəzinə çevirərək ölkəmizin bu sahədə artan rolunu bir daha nümayiş etdirir.
Tədbirin açılışında kosmosun sadəcə bir vasitə deyil, elmi siyasətlə, sənayeni innovasiya ilə, qlobal baxışı isə yerli fəaliyyət arasında bir körpü olduğu vurğulanıb. Bakı artıq kosmik tədbirlərin mərkəzi olaraq - 2023-cü ildə Beynəlxalq Astronavtika Konqresi, COP29 çərçivəsində Kosmik Liderlərin Sammiti, STC kimi regional tədbirlər sayəsində beynəlxalq görüşlərin, tərəfdaşlıqların, ortaq strategiyaların qurulduğu məkana çevrilib.
Bizimlə əlaqə
Peşəkar komandamız sizi maraqlandıran sual və sorğularınıza cavab verməyə hər zaman hazırdır.