Azərbaycan Nəqliyyat və Kommunikasiya Holdinqinin (AZCON Holding) tərkibində fəaliyyət göstərən Azərkosmos yüksək beynəlxalq mükafata layiq görülüb. Şirkətin peyk üzərindən genişzolaqlı rabitə təmin edən “Azconnexus” məhsulu ən yaxşı “VSAT Service Provider” (VSAT xidmət təchizatçısı) nominasiyası üzrə mükafat ilə təltif olunub.
Mükafat “BroadcastPro Manufacturer Awards” (BroadcastPro istehsalçı mükafatları) tədbiri çərçivəsində təqdim olunub. “BroadcastPro” mükafatı müştərilər və sənaye iştirakçıları arasında nüfuz qazanmış və regionun yayım sektorunun inkişafına töhfə verən aparıcı istehsalçıları, şəbəkə operatorlarını və təchizatçıları fərqləndirən prestijli mükafatlardandır.
VSAT (Very Small Aperture Terminal) – kiçik ölçülü peyk antenası texnologiyasıdır və ucqar ərazilərdə genişzolaqlı internet, məlumat ötürülməsi və digər rabitə xidmətlərinin təmin edilməsində istifadə olunur. Bu texnologiya müxtəlif sənaye və dövlət strukturlarında etibarlı əlaqə infrastrukturunun qurulmasına imkan verir.
“Azconnexus” xidməti Azerspace-1 və Azerspace-2 peykləri üzərindən, həm C-band, həm də Ku-band spektrlərində Dövlət, Korporativ və Mobil sektorlarının ehtiyaclarına uyğun şəkildə optimallaşdırılmış, ən ucqar və çətin mühitlərdə belə kəsintisiz və yüksək sürətli peyk bağlantısı təmin edir.
“Azconnexus”-un bu nüfuzlu mükafata layiq görülməsi, Azərbaycanın peyk sənayesinin texnoloji inkişafını, qlobal rəqabət qabiliyyətini və regionda lider mövqeyini bir daha nümayiş etdirir. Bu uğur ölkəmizin yüksək texnologiyalar sahəsində beynəlxalq əməkdaşlıqlarını gücləndirməyə və milli kosmik sənayenin ixrac potensialını artırmağa xidmət edir.
Peşəkar komandamız sizi maraqlandıran sual və sorğularınıza cavab verməyə hər zaman hazırdır.