Azərbaycan Respublikasının Kosmik Agentliyi - Azərkosmosla Elm və Təhsil Nazirliyinin Geologiya və Geofizika İnstitutu arasında qarşılıqlı əməkdaşlığa dair memorandum imzalanıb.
Memoranduma əsasən peyk məlumatlarından istifadə etməklə işğaldan azad olunmuş ərazilərdə faydalı qazıntı yataqlarının tapılması üçün tədqiqatın aparılması, ölkə ərazisində seysmik riskin qiymətləndirilməsi, peyk təsvirləri və geoloji məlumatlar əsasında sürüşmə areallarının monitorinqi, əsas su anbarlarının, yeraltı su resurslarının qiymətləndirilməsi və sudan səmərəli istifadə üçün təkliflərin hazırlanması birgə fəaliyyətin əsas istiqamətlərindən olacaq.
Eyni zamanda peyk təsvirlərindən istifadə etməklə innovativ məhsulların yaradılması Azərkosmos və Geologiya və Geofizika İnstitutunun birgə fəaliyyət istiqamətinə daxildir.
Kosmik Agentliyin sədri Saməddin Əsədov bildirib ki, memorandum ölkəmizdə elmi-tədqiqat layihələrin icrasında mühüm töhfə verəcək. Azərkosmos Geologiya və Geofizika İnstitutuna elmi tədqiqat işləri çərçivəsində tədqiqat ərazilərinə aid peyk təsvirlərinin verilməsi, o cümlədən İnstitutla qarşılıqlı təcrübə mübadiləsi, peşəkar kadrların hazırlanması və birgə təlimlərin təşkili məsələlərini daim diqqətdə saxlayacaq.
Bununla yanaşı, memorandumda qurumlar arasında kosmik sahə üzrə kommersiya yönümlü birgə fəaliyyət də öz əksini tapıb.
Bizimlə əlaqə
Peşəkar komandamız sizi maraqlandıran sual və sorğularınıza cavab verməyə hər zaman hazırdır.