Məktəblilər Türkiyənin Kosmik Düşərgəsində İştirak Ediblər

Azərkosmosun KOSMİK Akademiyasının təşkilatçılığı ilə Dünya məktəbi, Landau school və 132-134 nömrəli Təhsil Kompleksinin 9-16 yaş aralığındakı məktəbliləri, 16-21 noyabr tarixlərində Türkiyənin məşhur kosmik düşərgəsi olan Space Camp Türkiye-yə səfər edib. "Ulduzlar və Planetlər Arasında Kosmik Macəra" (Customer Outer Space Adventure) layihəsi çərçivəsində 25 nəfərdən ibarət heyət kosmos elmini öyrənib, yeni təcrübələr əldə edib və müxtəlif elmi fəaliyyətlərdə iştirak edib.

Layihənin əsas məqsədi məktəblilərə kosmos elmi sahəsində dərindən biliklər vermək və elmi kəşflərə dair praktiki təcrübə əldə etmələrinə şərait yaratmaqdır.

Düşərgə müddətində iştirakçılar STEAM (Elm, Texnologiya, Mühəndislik, İncəsənət və Riyaziyyat) sahələrində müxtəlif təlimlərdə iştirak ediblər. Bu təlimlər arasında astronavt simulyatoru hazırlığı, aya uçuş missiyaları, Marsda kolonizasiya, hidrofonika, aeronavtika və aerokosmik təlimlərə hazırlıq kimi mövzular yer alıb. Məktəblilər həmçinin, komanda işi və liderlik bacarıqlarını inkişaf etdirən müxtəlif kosmik mövzulu tapşırıqlar ediblər.

Proqramda uğurla iştirak edən məktəblilər, Space Camp Türkiye tərəfindən beynəlxalq sertifikatla təltif olunublar.

Space Camp Türkiye, 12 iyun 2000-ci ildən İzmir şəhərində fəaliyyət göstərir və ABŞ-nın Alabama ştatındakı kosmik düşərgədən sonra dünyada ikinci belə düşərgədir. Hər il 9-16 yaş arası 260.000-dən çox iştirakçıya ev sahibliyi edən bu düşərgə, 60-dan çox ölkədən gələn məktəblilərə STEAM sahəsində təlimlər və praktik məşğələlər təqdim edir. Space Camp Türkiye Alabama Kosmik Elm Sərgi Komissiyası tərəfindən lisenziyalaşdırılıb.

Bu cür layihələr, Azərbaycan məktəblilərinin beynəlxalq səviyyədə kosmos elmi sahəsindəki bilik və bacarıqlarını artırmaqla yanaşı, onların elmi fəaliyyətlərə olan marağını da gücləndirir.